خواردنى ماسى له رەمەزان

ماسى و رەمەزان
ماسی بە یەكێك لەو خۆراكانە دادەنرێ كە هەرسكردنی خێرایە و لە هەمانكاتیشدا پێكهاتەی گرنگی خۆراكی تێدایە، كاریگەری هەیە بۆ پاراستنی لەش لە نەخۆشییەكان.
ماسی بە یەكێك لە سەرچاوە گرنگەكانی پرۆتین دادەنرێت، هەمان پرۆتینی پێویستی تێدایە كە لە گۆشت و هێلكەو بەرهەمە شیرەمەنییەكاندا هەیە. دكتۆر راویە عەبدولغەنی مامۆستای پسپۆڕی زانستی خۆراك لە زانكۆی قاهیرە دەڵێ ترشە ئەمینیە بنچینەییەكان لە ماسیدا هەن كە بۆ بیناكردن و گەشەی لەش گرنگن، هەروەها قەرەبووی شانە لەنێوچووەكان یان لاوازەكان دەكاتەوە. ئەوە جگە لەوەی لە ماسیدا كۆمەڵێك ڤیتامینی بنچینەیی هەن كە گرنگترینیان ڤیتامین A، ڤیتامین D، ڤیتامین B، لەگەڵ ڤیتامین B6ی تێدایە، كە بەشدارن لە زۆربەی كارلێكەكانی كۆئەندامی دەمار و پێستدا.
لێكۆڵینەوە زانستییەكانی ئەمریكاش سەلماندوویانە خواردنی ماسی هەفتانە دووجار دەبێتە دابینكردنی سەرچاوەیەكی گرنگی تەندروستی لەش و رۆژانە یەك گرام لە ئۆمیگا3 كە ترشێكی چەورییە لە لەشدا، هاوسەنگ دەكات.
دكتۆر راویە ئامۆژگاری كابانی ماڵ و خاوەن خێزانەكان دەكات جۆرێكی ماسی برژاو یان سووركراو یان لە فڕندا ئامادەكراو بۆ سەر سفرەی رەمەزان ئامادە بكەن، چونكە هەرسكردنی ئاسانەو ئەو چەوریانەی كە لە ماسیدا هەن، ترشە چەورییەكانن، كە زیانبەخش نین و پێویستن بۆ مرۆڤ.