تیروپشكى قۆناغى گروپه‌كانى خولى یانه‌ پاڵه‌وانه‌كانى ئه‌ورووپا راكێشرا

له‌ ڕێوڕه‌سمێكدا له‌ شارى مۆناكۆى فه‌ڕه‌نسى تیروپشكى قۆناغى گڕوپه‌كانى وه‌رزى دووهه‌زارویازده‌ دووهه‌زارودوازده‌ى خولى تۆپى پێى یانه‌ پاڵه‌وانه‌كانى ئه‌وڕوپا ڕاكێشرا، له‌ تیروپشكه‌كه‌دا سى و دوو یانه‌ى گه‌یشتوو بۆ ئه‌م قۆناغه‌ به‌سه‌ر هه‌شت گڕوپ دابه‌شكران، یانه‌ى به‌رشلۆنه‌ى ئیسپانى پاڵه‌وانى وه‌رزى ڕابردووى خوله‌كه‌ كه‌وته‌ گڕوپى هه‌شته‌م و له‌م گڕوپشدا یارى له‌گه‌ڵ یانه‌كانى ئه‌ى سى میلانى ئیتاڵى و باتى بۆریسۆڤى بیلاڕووسى و ڤیكتۆریا پێلزنى چیكى ده‌كات، یانه‌ى مانچسته‌ریونایتدى ئینگلیزى دووه‌مى وه‌رزى ڕابردووش له‌ گڕوپى سێیه‌م ڕوو به‌ ڕووى یانه‌كانى به‌نفیكاى پورتوگالى و بازلى سویسرى و ئۆتیلول گالاتى ڕۆمانى ده‌بێته‌وه‌.

لاى خۆشیه‌وه‌ یانه‌ى ڕیال مه‌دریدى ئیسپانى له‌ گڕوپى چواره‌م یارى له‌گه‌ڵ یانه‌كانى لیۆنى فه‌ڕه‌نسى و ئه‌یاكس ئه‌مستردامى هۆڵه‌ندى و دینامۆ زه‌گربى كڕواتى ده‌كات، هاوكات له‌ گڕوپى پێنجه‌م دا یانه‌ى چێڵسى ئینگلیزى ڕوو به‌ ڕووى یانه‌كانى ڤاڵێنسیاى ئیسپانى و بایه‌رلیڤه‌ركوزنى ئه‌ڵمانى و جینیكى به‌لجیكى ده‌بێته‌وه‌، له‌ گڕوپى دووه‌میشدا یانه‌ى ئه‌نته‌رمیلانى ئیتاڵى كه‌وته‌ به‌رامبه‌ر یانه‌كانى سیسكا مۆسكۆى ڕووسى و لیلى فه‌ڕه‌نسى و ترابزۆن سپۆرى توركى .