كێشه‌ى یاریزانانى خولى یانه‌كانى ئیسپانیا چاره‌سه‌ركرا

KTV ...


دواى چه‌ند گفتوگۆیه‌كى نێوان یه‌كگرتووى خولى پیشه‌گه‌ره‌كانى ئیسپانیاو یاریزانانى خوله‌كه‌، سه‌رنجام یاریزانانى ئیسپانیا مانگرتنه‌كه‌یان شكاندو بڕیاریاندا به‌شدارى له‌ یاریه‌كانى لالیگا دا بكه‌ن، به‌مه‌ش شه‌ممه‌ى داهاتوو ڕكابه‌ریه‌كانى وه‌رزى نوێى خولى تۆپى پێى یانه‌كانى ئیسپانیا به‌ شێوه‌یه‌كى ئاسایى ده‌ستپێده‌كات، له‌مباره‌وه‌ خۆسێ لویس ئیستیازان سه‌رۆكى یه‌كگرتووى خولى پیشه‌گه‌ره‌كانى ئیسپانیا ڕایگه‌یاند كه‌ له‌گه‌ڵ یاریزانان گه‌یشتنه‌ ڕێككه‌وتن بۆ چاره‌سه‌ركردنى گرفته‌كانى تایبه‌ت به‌ قه‌رزى كه‌ڵه‌كه‌ بووى بڕى مووچه‌و گرێبه‌ستى یاریزانان و له‌ ئه‌نجامدا یاریزانان بڕیاریاریاندا مانگرتنیان بشكێنن و جارێكى دیكه‌ به‌شدارى له‌ یاریه‌كانى خولى ئیسپانیا بكه‌نه‌وه‌، واش بڕیاره‌ شه‌ممه‌ى داهاتوو ڕكابه‌ریه‌كانى وه‌رزى نوێى خولى تۆپى پێى یانه‌ پله‌ یه‌كه‌كانى ئیسپانیا به‌ ئه‌نجامدانى یاریه‌كانى گه‌ڕى دووه‌م ده‌ستپێبكات و له‌ كۆتایى قۆناغى یه‌كه‌میشدا یاریه‌ دواخراوه‌كانى گه‌ڕى یه‌كه‌مى خوله‌كه‌ به‌ڕێوه‌ده‌چێت، له‌ یازده‌ى ئه‌م مانگه‌داو به‌هۆى ناڕه‌زایى ده‌ربڕینى یاریزانانى خولى ئیسپانیا له‌به‌رامبه‌ر دواكه‌وتنى بڕى مووچه‌و گرێبه‌سته‌كانیان، یاریه‌كانى گه‌ڕى یه‌كه‌م ئه‌نجامنه‌دراو واده‌ى ده‌ستپێكردنى خوله‌كه‌ش دواخرا .