هه‌ڵبژارده‌ى ئۆڵۆمپى عێراق گه‌یشته‌ قۆناغى سێیه‌مى پاڵاوتنه‌كانى ئۆڵۆمپیادى له‌نده‌ن

هه‌ڵبژارده‌ى ئۆڵۆمپى عێراق سه‌ركه‌وت بۆ قۆناغى گڕوپه‌كان له‌ پاڵاوتنه‌كانى پێشبڕكێى تۆپى پێى خولى یاریه‌كانى ئۆڵۆمپیادى له‌نده‌نى 2012، له‌ یارى هاتنى قۆناغى دووه‌مى پاڵاوتنه‌كاندا هه‌ڵبژارده‌ى ئۆڵۆمپى عێراق دوور له‌ پێشبینیه‌كان به‌ربه‌ستى هه‌ڵبژارده‌ى ئۆڵۆمپى ئێرانى بڕى و له‌ پاڵاوتنه‌كان دوورى خسته‌وه‌، یاریه‌كه‌ له‌ یاریگاى ئازادى له‌ تارانى پایته‌ختى ئێران به‌ڕێوه‌چوو كه‌ له‌ گێمى یه‌كه‌مدا هه‌ڵبژارده‌ى ئۆڵۆمپى عێراق به‌ گۆڵێك پێشكه‌وت، گۆڵه‌كه‌ش له‌ ڕێگاى یاریزان ئه‌مجه‌د ڕازى له‌ خوله‌كى سى و چواردا تۆماركرا، له‌ گێمى دووه‌م و له‌ خوله‌كى شه‌ستوسێشدا ئه‌مجه‌د ڕازى گۆڵى دووه‌مى خۆى و هه‌ڵبژارده‌كه‌ى تۆماركردو ڕوو به‌ ڕوو بوونه‌وه‌كه‌ش به‌سه‌ركه‌وتنى هه‌ڵبژارده‌ى ئۆڵۆمپى عێراق به‌ دوو گۆڵى بێ به‌رامبه‌ر كۆتایى هات.

له‌ یارى چوونیشدا كه‌ یه‌كشه‌ممه‌ى ڕابردوو له‌ یاریگاى شه‌هید فڕه‌نسۆ هه‌ریرى له‌ شارى هه‌ولێر به‌ڕێوه‌چوو و تیایدا هه‌ڵبژارده‌ى ئۆڵۆمپى ئێران به‌ گۆڵێكى بێ به‌رامبه‌ر سه‌ركه‌وتنى به‌ده‌ستهێنابوو، بۆیه‌ به‌ كۆكردنه‌وه‌ى ئه‌نجامى هه‌ردوو یارى چوون و هاتن هه‌ڵبژارده‌ى ئۆڵۆمپى عێراق به‌ دوو گۆڵ به‌رامبه‌ر به‌ گۆڵێك پێش هه‌ڵبژارده‌ى ئۆڵۆمپى ئێران كه‌وت و شان به‌ شانى 11هه‌ڵبژارده‌ى ئۆڵۆمپى دیكه‌ى كیشوه‌رى ئاسیا سه‌ركه‌وت بۆ قۆناغى سێیه‌م و یه‌كلایى كه‌ره‌وه‌ى پاڵاوتنه‌كان.

له‌م قۆناغه‌شدا 12 هه‌ڵبژارده‌ به‌سه‌ر 3 گڕووپ دابه‌ش ده‌كرێن و یاریه‌كانیش له‌ 21ى ئه‌یلولى داهاتوو ده‌ستپێده‌كات .