مه‌درید کاکای ناوێت و له‌ نیمار نزیك ده‌بێته‌وه‌

مه‌درید کاکای ناوێت و له‌ نیمار نزیك ده‌بێته‌وه‌

رۆژنامه‌ی (AS)ی ئیسپانی بڵاوی کرده‌وه‌ که‌: "خۆزێ مۆرینهۆی راهێنه‌ری یانه‌ی ریال مه‌درید به‌ یاریزان کاکای راگه‌یاندووه‌ که‌ چیتر پشتی پێ نابه‌ستێت و له‌ وه‌رزی داهاتوودا، وه‌کو یاریزانی یه‌ده‌گ مامه‌ڵه‌ی له‌گه‌ڵدا ده‌کات". نیمار دا سیلڤا

له‌لایه‌ن خۆیه‌وه‌، یاریزان کاکا بۆ چه‌ندین جار ئه‌وه‌ی درکاندووه‌ که‌ نایه‌وێت یانه‌ی مه‌درید به‌جێبێڵێت و دووباره‌ روو بکاته‌ خولی ئیتاڵی، به‌ڵام وا دیاره‌ ئه‌م هه‌ڵوێسته‌ی یانه‌ی شاهانه‌ وا له‌و یاریزانه‌ ده‌کات که‌ ریزه‌کانی به‌جێبێڵێت و یانه‌ی ئینته‌رمیلانی ئیتاڵیش باشترین شوێن ده‌بێت بۆ کاکا.

جێگای ئاماژه‌یه‌، یانه‌ی ریال مه‌درید یاریزان کاکای له‌ یانه‌ی ئه‌ی سی میلانی ئیتاڵی به‌ بڕی (65) ملیۆن یۆرۆ کڕی، به‌ڵام به‌هۆی ئه‌و ژماره‌ زۆره‌ی پێکان که‌ یاریزانی ناوبراو تووشی هات، نه‌یتوانی ئاستی راسته‌قینه‌ی خۆی له‌و یانه‌یه‌ پێشکه‌ش بکات، بۆیه‌ یانه‌ی ناوبراو ئاماده‌یه‌ له‌م وه‌رزه‌ ده‌ستبه‌رداری بێت.

له‌لایه‌کی دیکه‌وه‌، یانه‌ی ریال مه‌درید نزیك بۆته‌وقه‌ له‌ ئیمزاکردنی بۆند له‌گه‌ڵ یاریزانی لاوی یانه‌ی سانتۆسی به‌رازیلی (نیمار دا سیلڤا)ی ته‌مه‌ن (19) ساڵ.

پێشتر، یانه‌ی شاهانه‌ رایگه‌یاندبوو که‌: "ئاماده‌یه‌ بڕی (45) ملیۆن یۆرۆ بداته‌ یانه‌ی سانتۆس بۆئه‌وه‌ی ده‌ستبه‌رداری ئه‌م یاریزانه‌ بێت له‌ به‌رژه‌وه‌ندی یانه‌ی ناوبراو".

له‌ لێدوانێکی رۆژنامه‌وانیشدا، یاریزان نیمار ئه‌وه‌ی راگه‌یاندبوو که‌: "ئه‌و ره‌نگه‌ی که‌ حه‌زی لی ده‌که‌م، سپییه‌"! ئه‌مه‌ش مانای وایه‌ که‌ یاریزانی ناوبراو ئاره‌زووی یاریکردنی هه‌یه‌ له‌ ریزه‌کانی یانه‌ی ریال مه‌درید.