مەترسی تێكەڵكردنی دەرمان

گوتوویانە «شتی باشتر بۆ ژیانێكی باشتر لەڕێگای كیمیاوە»، ئەگەرچی دەرمان بەشێكی زۆر گرنگە لەچارەسەری پزیشكیدا، بەڵام گرفتەكە لەوكاتە سەرهەڵدەدات كە هەندێك دەرمان لەگەڵ یەكتردا كارلێك دەكەن، تێكەڵبوونی ماددەی كیمیایی یان دەرمان لەناو لەشدا لەوانەیە كارەساتی تەندروستی لێبكەوێتەوە. دەرمانەكان Medications ماددەی كیمایین، جیاوازیان هەیە لەپێكهاتن و ڕاددەی ترشی و تفتیدا. هەندێك دەرمان دەبنە هۆی زیادكردنی كاریگەرییەكانی دەرمانێكی تر Synergestic یان كەمكردنەوەی كاریگەری دەرمانێكی تر Antagonistic یان شاردنەوە یان دواخستنی كاریگەری دەرمانێكی دیكە. تێكەڵكردنی دەرمانەكان دەبێتە هۆی زیادكردنی زیانە لابەلایەكان لەسەر بەشە جیا جیاكانی لەشدا، كاریگەرییە خراپەكانی تێكەڵكردنی دەرمان بەندە بەژمارەی ئەو دەرمانانەی كە بەیەكەوە بەكاریان دەهێنیت، بۆ نموونە تێكەڵكردنی 2 دەرمان ئەگەری زیانە لابەلایەكان بەڕێژەی 5% زیاتر دەكات، تێكەڵكردنی 5 جۆرە دەرمان ئەگەری زیانە لابەلایەكان بۆ 50% بەرزدەكاتەوە، هەروەها تێكەڵكردنی 8 جۆری دەرمان ئەگەری زیانە لابەلایەكان لەبەر كارلێككردنیان بۆ 100% بەرزدەكاتەوە، بۆیە تێكەڵكردنی دەرمان هەندێك جار مەترسی دەخاتە سەر ژیان. ئەگەرچی هەندێك لەو نەخۆشانەی كە شەكرە و بەرزبوونەوەی پەستانی خوێن و كۆلیستیرۆلی بەرزیان هەیە لەوانەیە كە پتر لە5-7 دەرمان بەیەكەوە وەربگرن و دوچاری زیانی لابەلای زیاتری دەرمانەكان بن، بەڵام لێرەدا بەچاودێری دكتۆر بڕ و جۆری دەرمانەكان بەشێوەیەك ڕێك دەخرێت كە نەخۆشییەكان بەبێ ئاڵۆزی لەژێر كۆنترۆڵدا بمێننەوە لەگەڵ كەمترین ڕێژەی زیانە لابەلایەكانی تێكەڵكردنی دەرمان.