جارێ وەرە..............

پەنجەرەكەتان دامەخە ئەی نازانی هەناسەی من
لە ئەو پەنجەرەیەوە دێ
ئەی نازانی خۆری ژینم لە ناو چاوی تۆوە هەڵدێ ؟
پێكەنینت وەكو بەفرە نیگات هەروەكو خۆر گەرمە
وا هەست دەكەم لە ناو شاری عەشقی تۆدا
دێوانەم و ئەوینی تۆ تاجی سەرمە

وەرە ببینە پاڵەوانی ڕۆمانی عەشق

وەرە گیانە هەتاوەكو
كۆڵانە ڕووخاوەكانی عەشق ئاوەدان كەینەوە

وەرە باوەكو ئەستێرە بۆ شەوی عەشق دەركەوین
وەك دوو مناڵی هارو هاج
بە چناری خۆشەویستیدا سەركەوین

دەی وەرە با چەپكە نێرگز بەسەر عاشقانا دابەش كەین
هەر عاشقێك بێ وەفا بوو
بە خۆڵی ژێر پێی مەم و زین ئێمە ڕوخساری بۆ ڕەش كەین

من حەزەكەم لە ڕێی تۆدا لە ئازاری عەشق تێربم
حەزدەكەم وەك شەم بسوتێم یان زمانی بولبول فێربم

دە تۆش وەرە
ئەو كاتانەی كە لێت دوورم ڕۆژم لە چاوت ڕەشترە
ئەو كاتانەی تۆ میوانمی شەوم لە گۆنات گەشترە

دڵم بووە بە موسافیر
ئازیزەكەم ڕێگەی عەشقت بووە بە ڕێگەی گەشتی من
لە دووریت نوقمی دۆزەخم دڵی تۆیە بەهەشتی من




ئارام عبدالڵە