هه‌رزانترین كۆمپیوته‌ری‌ جیهان

به‌پێی‌ هه‌واڵێكی‌ ڕۆژنامه‌ی‌ وه‌فد، دوێنێ‌ هندستان له‌ڕاگه‌یه‌ندنێكیدا، په‌رده‌ی‌ له‌سه‌ر ئامێرێكی‌ كۆمپیوته‌ری‌ پلێتی‌ لاداوه‌، كه‌ داده‌نرێت به‌هه‌رزانترین كۆمپیوته‌ر له‌جیهاندا، نرخه‌كه‌شی‌ ده‌گاته‌ (46) دۆلار
ئامانج له‌و كاره‌، كارئاسانیكردنه‌ بۆ چه‌ندین ملیۆن خوێندكاری‌ ئه‌و وڵاته‌، به‌و مه‌به‌سته‌ی‌ ده‌ستیان به‌و ئامێره‌ پێشكه‌وتووه‌ ڕابگات، كه‌ شۆڕشێكی‌ له‌جیهانی‌ ته‌كنۆلۆژیای‌ زانیاریدا هێناوه‌ته‌ كایه‌وه‌
له‌و باره‌یه‌وه‌ سه‌رپه‌رشتیاری‌ گروپی‌ (داتا ویند) كه‌ دروستكه‌ری‌ ئامێره‌كه‌یه‌‌و بنكه‌ سه‌ره‌كییه‌كه‌ی‌ له‌كه‌نه‌دایه‌، له‌ڕاگه‌یاندنێكدا وتی‌:"حكومه‌تی‌ هندستان 100 هه‌زار دانه‌ له‌و ئامێره‌ی‌ كڕیوه‌، به‌ 2276 ڕوپیه‌، به‌نیازیشه‌ به‌خۆڕایی‌ دابه‌شی بكات به‌سه‌ر خوێندكار‌و قوتابیانی‌ وڵاته‌كه‌یدا"، له‌هه‌مان كاتدا ئه‌و پێی‌ وایه‌ كه‌ پێده‌چێت نرخی‌ ئامێره‌كه‌ له‌و نرخه‌ی‌ ئێستای‌ زیاتر دابه‌زێت‌و بگاته‌ 35 دۆلار، تا دواجار له‌كۆتایدا بگاته‌ 10 دۆلار
ئه‌و ئامێره‌ نوێیه‌، كه‌ له‌هندستان دروستكراوه‌ ناوی‌ (ئاكاش)ه‌، كه‌ به‌مانای‌ ئاسمان دێت، قه‌باره‌كه‌ی‌ ناوه‌ندییه‌‌و شاشه‌كه‌ی‌ به‌ده‌ستپیاهێنان واته‌ (له‌مس) كارده‌كات، وایه‌ر لێسه‌ بۆ ئینته‌رنێت‌و توانای‌ خوێندنه‌وه‌ی‌ فایله‌ ڤیدیۆییه‌كانیشی‌ هه‌یه‌، پاترییه‌كه‌ی‌ بۆ 180 خوله‌ك كارده‌كات، ئه‌مه‌ جگه‌ له‌وه‌ی‌ به‌پرۆگرامی‌ ئاندروید كارده‌كات‌و توانای‌ هه‌ڵگرتنی‌ 32 گێگابایتی‌ هه‌یه‌