یاریگای‌ بارزان ده‌كرێته‌ نێوده‌وڵه‌تی‌

ئاسۆی‌ وه‌رزش - ڕه‌هه‌ند هه‌ڵۆ
به‌ بڕیارێكی‌ جێگری‌ سه‌رۆكی‌ پارتی‌ دیموكراتی‌ كوردستان، یاریگای‌ بارزان له‌ شاری‌ زاخۆ ده‌ڕوخێنرێت و ده‌كرێته‌ یاریگایه‌كی‌ نێوده‌وڵه‌تی‌ بۆ ئه‌و یانه‌یه‌و بۆ شاره‌كه‌.
عه‌بدولوه‌هاب بارزانی‌ سه‌رۆكی‌ یانه‌ی‌ زاخۆ به‌ ئاسۆی‌ وه‌رزشی‌ ڕاگه‌یاند؛ له‌سه‌ر بڕیاری‌ نێچیره‌ڤان بارزانی‌ ئه‌و یاریگایه‌ نۆژه‌ن ده‌كرێته‌وه‌و ده‌كرێته‌ یاریگایه‌كی‌ نێوده‌وڵه‌تی‌ كه‌ له‌لایه‌ن كۆمپانیایه‌كی‌ سویدییه‌وه‌ جێبه‌جێده‌كرێت، وتیشی‌: "بڕیاروایه‌ له‌ دوای‌ كۆتاییهاتنی‌ خولی‌ نوخبه‌ی‌ عیراقه‌وه‌ ده‌ست به‌ چاككردن و به‌ نێوده‌وڵه‌تیكردنی‌ ئه‌و یاریگایه‌ بكرێت، كه‌ بڕیاروایه‌ جێگه‌ی‌ 20 هه‌زار كورسی‌ تێدابكرێته‌وه‌".
سه‌رۆكی‌ یانه‌ی‌ زاخۆ ئاماژه‌ی بۆ ئه‌وه‌شكرد، كه‌ به‌ بڕیارێك ئه‌و یاریگایه‌ خراوه‌ته‌سه‌ر یانه‌ی‌ زاخۆو به‌ده‌رله‌وه‌ش ئێستا له‌ شاری‌ زاخۆ یاریگایه‌كی‌ تر بۆ یانه‌ی‌ زاخۆ دروستكراوه‌ و له‌ قۆناغی‌ كۆتاییدایه‌و بڕیاره‌ له‌ مانگی‌ ئه‌یلولی‌ ئه‌مساڵ كۆتاییپێبێت.
یانه‌ی‌ زاخۆ له‌ ساڵی‌ 1987 ه‌وه‌ دامه‌زراوه‌و له‌ ئێستاشدا له‌ خولی‌ نوخبه‌ی‌ عیراقی‌ له‌ كۆمه‌ڵه‌ی‌ باكور له‌ پله‌ی‌ سێیه‌مدایه‌و ئه‌مساڵیش تیپه‌ كوردستانیه‌كه‌ی‌ بووه‌ خاوه‌نی‌ یه‌كه‌م جامی‌ كوردستان.