عێراق مانگی ده‌ستکرد دروست ده‌کات

چه‌ند ئه‌ندازیارێکی عێراقی بۆ ماوه‌ی دوو ساڵ له‌ وڵاتی‌ ئیتاڵیا خولێکی راهێنانیان بۆ ده‌کرێته‌وه‌ به‌مه‌به‌ستی ئاماده‌کردنیان بۆ دروستکردنی یه‌که‌مین مانگی ده‌ستکرد له‌سه‌ر ئاستی وڵاته‌ عه‌ره‌بییه‌کان.

له‌و باره‌یه‌وه‌ به‌رپرسێکی باڵای وه‌زاره‌تی ده‌ره‌وه‌ی ئیتاڵیا به‌ سایتی (ئه‌لمواتن نیوز)ی راگه‌یاندووه‌: له‌کۆتایی ئه‌مساڵدا ئیتاڵیا چه‌ند ئه‌ندازیارێکی عێراقی راده‌هێنێت له‌سه‌ر دروستکردنی یه‌که‌مین مانگی ده‌ستکردی عێراقی و ئه‌ندازیاره‌کان به‌گوێره‌ی توانا و شاره‌زایی به‌رز هه‌ڵده‌بژێردرێن.

ئه‌و به‌رپرسه‌ ئیتاڵیه‌ جه‌ختی کردووه‌ته‌وه‌ که‌ ئه‌وان متمانه‌یان هه‌یه‌ ئه‌ندازیاره‌ عێراقییه‌کان دوای دوو ساڵه‌که‌ ده‌توانن مانگه‌ ده‌ستکرده‌که‌ دروستبکه‌ن و له‌و رێگایه‌وه‌ زانیاری و داتا وه‌ربگرن و بنێرن، ر‌وونیشیکردووه‌ته‌وه‌ قه‌باره‌ی مانگه‌ ده‌ستکرده‌که‌ بچووک ده‌بێت و بۆ مه‌به‌ستی راگه‌یاندن و په‌یوه‌ندییه‌کان و چاودێریکردنی سنووره‌کانی عێراق به‌کارده‌هێنرێت.